مالناش غيرك نترجاه   *
رافعينلك يا إلهنا صلاة.. ملناش غيرك يا الله
وعشان انت الحق ضروري.. العدل هياخد مجراه
لو حقنا مهضوم أو ضاع.. صَلَح من تاني الأوضاع
بدموع عنينا جينا تعيننا.. ملناش غيرك نترجاه

اشفي لنا قلوبنا المكسورة.. عزّي أي نفوس مقهورة
صَبَرنا على اللي جرى لنا.. في "نجع حمادي" و"بهجورة"
أطفال لابسين لبس جديد.. راحوا يصلوا ف ليلة العيد
من غير ذنب اتقتلوا يا عالم.. ده يرضي مين وبإيه ها يفيد؟؟

و أدي أم وحاضنة الصندوق.. بتقول لابنها مالك فُوق
جهزت لك الأكل بإيدي.. قوم وارجع وويّايّا ودوق

لبسك ماله الدم ملاه؟ ده أنا لسه حالًا كوياه
مالك ساكت ومبترُدِش؟ صعبانة عليّ يا ولداه

دول ستة غير الإصابات.. قولوا كفاية للعصابات
أنا من حقي أعيش بكرامتي.. ويعيش في سلام الأقباط

سلمنا أمرنا في إيديك.. والظالم سايبينه عليك
احنا سامحنا اللي ظلمنا.. اتصرف زي ما يرضيك
مش هنقابل نار بالنار.. ولا عايزين ناخد بالتار
عايزينك تيجي تعزينا.. وتشيل مِنا أي مرار

ما بتنعسشي ولا بتنام.. وكلام مش بس كلام
قُلت مبارك شعبي ف "مصر".. ابعت تاني ل"مصر" سلام