حكايات زيكو ^0^ التكويم الإنجيلي ^0^

[زيكو]

ذات أحد من الأحاد... في العام إللي انقضى وفات
دخل الكنيسة قسيسنا الكبير... صاحب الإبتسامات
طلع على منبرها القديم العالي بسرعة الطيارات
وزي الطير والفراشات همس .. وصرخ في السماعات
سمعنا كلمة ربنا الحلوة وكانت غنية و مليانة بالبركات
خلصت الوعظة بسرعة وقربنا على السلامات
ورنمنا ترنيمة مكررة معناها إبعت يا رب وهات
وحطينا ايدينا على جيوبنا لما بدءت فقرة التنبيهات
لحسن تتكرر فيها التعليمات ... كَتروا كَتروا التبرعات
لكن المره دي يا سبحان من غير وجه السماوات
اختلفت لهجتة وهديت سرعته وأطلق التوجيهات
فالسنة دي قربت تنقضي وتخلص زي بقية السنوات
قال لنا إفرحوا إفرحوا افترجت الضيقات وخلصت الأزمات
ولازم علينا نغير عادتنا القديمة في شرا التقويمات
سيبكم من غيره واشتروا بتاع طايفتنا ده كله تجديدات
ولازم ولازم نشتريه دي الطايفة عاملة تخفيضات
بعد فراغه من التعليمات والترنيمات وخلصنا الصلوات..
جت اللحظات الحاسمات لحظة دفع الحجوزات
هللنا وجرينا و زقينا بعضينا ودسنا على الستتات
وأصبحت الكنيسة بقدرة قادر زي فرع من الجمعيات
بالراحة يا جماعة .. واحد واحد .. ده مطبوع بالألافات

و لبسنا كلنا هدوم العيد.. وفرحنا قبل المواعيد
لاجل نليق ونتباهى بتقويمنا.. ده فرح أكيد أكيد
رحنا عالمكتبة بعيلة العيلة والنسايب والجدود
وعيالي السبعة وامهم بعيلة عمهم بولدهم الوحيد
اجتماع السيدات والأسرة والجامعة ومدارس الأحد
قسيسنا وشيوخنا اجتمعوا .. ونظمولنا المواعيد
والشباب رتبوا الرحلة وتذاكر السكة الحديد
قبل الخلق صحينا لاجل ما نلحق ونصيد
دي الفرصة ممكن تضيع منا ونخسر عام جديد
زي ما ضاعت سنين كتيرة واحنا بدون تجديد

وجت اللحظة الحاسمة ... لحظة تسليم التقويم
همت الستتات بسرعة واستعدوا للتكويم
والعيال فرحوا وهللوا ... وانطلقوا بالترنيم
ده بيقولوا أيامه جميلة وكله شم نسيم
ومنظره و أياته ... تبشر بالخير والنعيم
هللويا مجدا .... ده ربك عمله عظيم
ده تقويمنا الإنجيلي وبعيد عن كل تقييم
يا ناس تعالولنا وهنونا ده احنا الإنجيليين
عملنا تقويمنا بتاعنا واتحررنا من التانيين

[[وفي يوم العيد سمعت جدتي بدأت بالتعديد
دموعها نزلت وصرخاتها تحَِزن البعيد
الأعياد نسيوها... والمناسبات مسحوها
والتواريخ طمسوها ... والأجازات لغيوها
شعارتهم كبروها ... وأيات الكتاب صغروها
أسمائهم علقوها ... وبالبنط كبروها
والصفحة زنقوها ... بتأملات حفظوها
مش أحسن لو كنا سبناها ... وللخبازين عطيناها
هاتوا فلوسنا اللي دفعناها ... وياريتنا ما وردناها



وعجبــــــــــــــــــــــــــــــــــــــــــــــ ــــــي

[زغيب]

Re: حكايات زيكو ^0^ التكويم الإنجيلي ^0^

تقويم إيه يا زيكو يا خويا قصدكك نتيجة السانة الجاية 2005
ما اللي اشترى اشترى واللا إيه ؟؟

وهما الإنجيليين برضه عاملين زمبليطه عالنتيجة بتاعتهم وبيبيعوها بالعافية زي بقية الطوايف .

وكمان ما فيش فيها المناسبات ولا الأعياد

راجع نفسك ودور تاني أكيد نسيت وهتلاقي المناسبات الرسمية

عيد الثورة وعيد العمال وأعياد الطفولة وأي مناسبة اجتماعية مش معقوله ينسوا حاجات مهمة زي دي

بس الإسلوب بتاعك ظريف ياريتني أعرف اكتب شعر زي اللي انت كاتبه ده فمثلا أقدر أقول :

النتيجة دي يا ولاد بتاعة البروستانت
وبالأمارة هاتلاقوها في بيت عمو وبيت طنط
ياحلاوة يا ولاد عالنتيجة ياولاد
ولافيها أعياد ولا مواسم ولا صيام ولا كلام رط


النتيجة دي إعجازة وفيها أيام الجمعة والأجازة
وباينة الآيات بالبنط الصغير والطباعة الممتازة
ياحلاوة يا ولاد عالنتيجة ياولاد
مفيهاش غير تأملات ووعظات حاجة آخر لذاذة

ياحلاوة يا ولاد عالنتيجة ياولاد .

[hanigad]

Re: حكايات زيكو ^0^ التكويم الإنجيلي ^0^

العضو الظريف زيكو

مرحبا بعودتك من جديد بيننا ... لقد اعتقدت انك تركت منتدياتنا لأماكن أخرى يعلمها الله .. (اقصد منتديات أخري) وياريت ما تفهمني غلط

وحشتنا موضوعاتك الساخنة بالرغم من قلتها ....

ولو إنك قمت بعمل رائع آخر ألا وهو أنك قد ذكرت الأخ زغيب بأنه لازال عضوا هو الأخر ...

الأخ زيكو على الرغم من ان مقالتك أعجبتني من حيث الأسلوب الزجلي ولكني قد أختلف معك من حيث المضمون (أرجو أن تتذكر انني قسيس كذلك) وأحب كنسيتي الإنجيلية من كل قلبي وأخاف عليها بكل جوارحي ... فالمنتدى هنا هدفه الرئسيي التحاور والنقاش البناء ... وبالطبع نحن نرحب كذلك بالنقد البناء ... طالما الهدف هو البناء وليس النقد لمجرد النقد ...

صديقي ارحب من كل قلبي بمثل هذه المقالات طالما دائما لا تخرج عن أطار الإحترام المتبادل بين أعضاء المنتدى وبعضهم البعض وكذك احترامهم لكنائسهم ورعاتها ومؤسساتها المختلفة


ننتظر موضاعتك الجديدة ونتظر ردودك على الموضوعات المنشورة هنا


والرب معك